Scho wieder isch es Jahr verbey,

nenei, muesch emu sicher nid truirig sey!

S'isch sicher interessant gsi, das letschtä Jahr,

und s'macht Dich zu däm wo Dui bisch, ich hoffe, das isch Dier klar!

Hesch hoffentlich viu Schtunde vo Frehlichkeit und Fräid gnosse,

oder eppä einisch e ganz schpeziellä Momänt mit Sekt begosse,

mängi Schtund mit deynä Liebschte verbrunge,

und wenn gueti Muisig im Radio gloffe isch, grad mitgsunge!

Ich vermuete, s'het ai es paar dunkli Seytä gha, das letschtä Jahr,

heikli Entscheidige oder schwierigi Situazione wo dänkt hesch "das isch doch nid wahr!"

truirigi Schtunde, wo d'Träne gflosse sind oder Momänte wo verruckt gsi bisch,

wo Dich hinterfragt hesch, fir wär und was as Dui ai dey Energie gisch...?

Doch luegid mier jetz i die zuekinftigi Zeyt,

da winschid mier Dier mängs Zämeträffe mit interessante Leyt,

tuisig Momänt zum schtuine und lache,

und nur die ouerbeschtä Sache!

Mier gratulierid Dier vo Härze zu deym Geburtstag,

mier findit's toll as mier Dich kennid, das isch doch gar kei Frag!

Lah Dich hit la feyrä und verwennä,

und due Dier immer wieder eppis schpeziells gennä!

210x95cm

Jedä Abschnitt im Läbe gahd einischt z'Änd,

jedi Tradizion gid me einischt us seynä Händ,

oues Scheenä isch irgendwenn verbey,

und s'het eim viu gäh zum Glicklich sey.

Doch gits de ai wieder Platz fir frischi Sache,

neywi Momänt zum schtuine und lache,

meh Zeyt fir unerwarteti Situazione im Autag;

Veränderige bruichts eifach, das isch doch gar kei Frag!

Und was eim niemer cha näh,

wo eim ganz viu duet gäh,

das sind d'Erfahrige und d'Erinnerige,

und oues Erläbte, wo eim duet sättige.

210x95cm

Liebs Bruitpaar

Es Härz – vou Liecht und Glanz

es Härz – gfiut mit Liäbi, vou und ganz

es Härz – vou Vertruiwä und Muät

es Härz – wo vor Fräid nur gumpe duät

Es Härz – vou Reschpäkt und Akzeptanz

es Härz – vou Ehrlichkeit und Toleranz

es Härz – vou Schtouz und Dankbarkeit

es Härz – vou Läbesluscht und Heiterkeit

Es Härz – gfiut mit au denä Sache,

derzue viu Momänte zum Schtuinä und Lache,

das winschid miär eych uf eychem gmeinsame Wäg,

und bleybid derzue no gsund und zwäg!

139x107cm

E Schtiefu vou Muet schänkid mier dier das Jahr,

dä chame immer eppä wieder bruiche, das isch eifach scho wahr.

Nid fir e Gleitschirmflug, fir's Bärgschteygä oder fir's Schiischpringä,

s'git ai Autagsgschichte wo eim nur mit Muet dient glingä.

Mängisch bruichts Muet, epperem d Wahrheit z'verzeuä,

oder sich bi Meinigsverschiedeheite uf ei Seytä z'schteuä,

e Veränderig vor z'näh, ja das isch nid immer ganz eifach,

oder epper uf nes Problem aaz'schpräche, ai das isch e sone Sach!

Ehrlich zu sich säuber sey, ai das bruicht enorm Muet,

s'chunnt pletzlich eppä einischt es Gfihl uif, wo eim Angscht mache duet.

De trotzdäm sey Wäg gah, muetig und vorsichtig zugleych,

das isch das, wo eim s'Läbe und s'Härz macht reych!

Mier winschid dier, as dui dey Traim truisch z'gah,

ai wenn's mängisch schier niemmer cha verschtah,

as dui das wagsch, wo Fräid und Glick darfsch empfinde derbie,

und dich nid vor luiter Verschtand und Hemmschweuä duesch zruggzieh!

Fir d' Wiehnachtszeyt und s'neywä Jahr winschid mier dier vo Härze viu Muet,

und fihlsch dui dich einischt ängschtlich und es gahd dier nid so guet,

de lueg i Schtifu und nimm so viu Muet wie grad bruichsch fir dey nechscht Schritt;

viu Fräid, Xundheit, Liebi, Erfiuig und nateyrlich Muet i deym zuekinftig Läbesabschnitt!

210x95cm

Rueh und bsinnlichi Momänt -

schier es Fremdwort i dr hitige Zeyt?

Gseht me uf dr Schtrass nid nur no gschtressti Leyt?

sich Zeyt näh fir sich säuber oder ai fir seyni Frindä,

ja, säg; duet me das nid eifach z wenig gfindä?

„Ha grad schier kei Zeyt“ – wie mängisch hend miär das scho gseit,

und villeicht ai gar nid viu derbie uberleit.

Sich eifach wieder vom Alltagsschtress lah treybä,

und nu es paar Termine meh i`d Agända schreybä!

Einisch häre sitze, sich eifach gschpire und d Rueh gniessä,

oder e bsinnliche Abig mit seynä Liebschte miteme Glesli Sekt begiessä,

ohni Zeytdruck chennä sich eppis Guets due,

villeicht ai nur e Schpaziergang dure Waud i voller Rueh?

Rueh und Zeyt gfindä i dr hitige Zeyt, ja das winsch ich Diär fir d Wiehnachtszeyt und fir die nechschtä Jahrä,

as ai Dui dey inner Friedä im Alltag immer darfsch bewahrä.

I däm Sinn scheeni, ruehigi WiehnachtsZEYT,

e guetä Schtart is neywä Jahr, und as niemer zwisched appe gheit!

210x95cm

Es Wichteli, ganz fir Dich elei,

muesch es mit niemerem teilä, nenei,

das schänk ich Dier das Jahr,

us vouer Fräid, das isch de wahr!

Das Wichteli seu Dier e huifä Glick bringä,

as Dier e huifä gueti Sache dent glingä,

es seu Dich ai zu Tate animierä,

und as villeicht Unvorschteubars duesch uisprobierä.

Ich hoffe, es schteckt Dier zwischedure chley Muet i’d Hosetäsche,

oder villeicht duets Dier eppä einischt dr Chopf chley wäsche…

…wemes bruicht, isch es guäd, macht ai das epper,

bisch sicher froh, wenn mängisch ai erscht viu schpeter!

Das Wichteli seu Dich vor Unglick und Sorge bewahre,

vor Chrankheit und oune andere Gfahre.

Es seu Dich begleitä uber d’Wiehnachtstäg und dur die nechscht Zeyt,

und es luegt sicher, as niemmer is Siuveschterloch gheyt!

I däm Sinn winsch ich Dier mit deym Wichteli viu Schpass i dr Adväntszeyt,

es herrlichs Wiehnachtsfäscht mit deynä liebä Leyt,

is neywä Jahr e guetä, xunde Schritt;

Prosit uf e Schtart ine frischä Läbesabschnitt!

210x95cm

"Tag der offenen Türe" chaisch im Blitz läse schier uf jederä Seytä,

ä gmiätliche Tag mit huifä kennigä Leyt duet das bedeytä.

Eppä es Kafe trinkä und e feini Wurscht vom Grill ässe,

so chame dr Autag fir nes Schutzili vergässe!

So ne offni Tirä wett ich Dier schänke,

aber nid nur fir ei Tag, chaisch ai dänke!

Mey Tirä isch fir Dich immer offe,

Dich gley einisch z'gseh, das duenich hoffe!

Die Tirä isch offe wenns Dier einisch langweylig isch,

fir ne churze Schwatz oder e luschtigi Story, chum sitz a Tisch!

Zum Seich verzeuä und lache bis eim dr Buich weh duäd,

zum "weisch nu..."-Gschichte firähole und Zuekunftsplän schmiede, das duäd doch guäd!

Ai fir chleyni Uiszeytä vom Autag het mey Tirä offe,

wenn Dich Chummer, Ängscht oder Truir het troffe,

de binich fir Dich da, due zuelose und due schtitzä,

oder wenn'd lieber neyd seisch, eifach zäme am Tisch sitzä.

Mey Tirä isch offe, ich fräie mich, Dich z'gseh,

z'luegä, wie's Dier gahd und nu viu meh!

Und jetz winsch ich Dier frohi Wiehnachtstäg und e guetä Schtart is neywä Jahr,

nach em Motto: "Alles klar!"

 210x95cm